តើអ្នករៀនព័ត៌មានវិទ្យាត្រូវរៀបចំបែបណាទើបមានភាពរីកចម្រើន?
 |
| Add caption |
បច្ចេកវិទ្យា កំពុងដើរទៅមុខយ៉ាងលឿង ប្រព័ន្ធព័ត៌មានវិទ្យា ជាតម្រូវការចាំបាច់សម្រាប់អាជីវកម្មជាច្រើននាពេលបច្ចុប្បន្ន និងទៅថ្ងៃអនាគត។ ជំនាញព័ត៌មានវិទ្យាត្រូវបានយកទៅប្រើប្រាស់ជាច្រើនផ្នែកនៅតាមស្ថាប័ន អង្គការ និងក្រុមហ៊ុន ដូចជាការបង្កើនទំនាក់ទំនងជាមួយដៃគូ ការគ្រប់គ្រង់ព្រព័ន្ធទិន្នន័យ ការងាររដ្ឋបាល និងការិយាល័យ ជាដើម។
ថ្ងៃនេះ LIFT បានជួបសម្ភាសន៍ជាមួយយុវជនដែលទទួលបានជោគជ័យ លើជំនាញនេះ ទាំងក្នុងការងារ និងឈានជើងបង្កើតឱកាស បើកអាជីវកម្មដោយខ្លួនឯង និងទទួលបានភាពជោគជ័យនាពេលកន្លងមក។
លោក ស្រេង សារ៉ែន ជាអ្នកគ្រប់គ្រងសាលាបង្រៀនភាសានិងកុំព្យូទ័រមួយដែលស្ថិតនៅក្នងស្រុក ត្រាំកក់ ខេត្ដតាកែវ ឈ្មោះសាលាភាសាពន្លឺសាស្រ្ត។ រូបថត វ៉ន ដារ៉ា
ស្រេង សារ៉ែន មានដើមកំណើតនៅស្រុក កោះអណ្ដែត ខេត្ដតាកែវ ជាប់នឹងព្រំប្រទល់រៀតណាម យុវជន បានឲ្យដឹងថា៖«ចំពោះទីផ្សារការងារលើជំនាញ ដូចយើងដឹងស្រាប់ហើយ ក្រុមហ៊ុនណាក៏គេត្រូវការអ្នកមានជំនាញនេះដែរ ក្រុមណាក៏ប្រើប្រាស់អ្នកបច្ចេកវិទ្យាដែរ ទាំងអ្នកជំនាញ កំព្យូទ័រ វ៉េបសាយ និងអ្នកគ្រប់គ្រងទិន្នន័យជាដើម»។
យុវជនបញ្ចប់បរិញ្ញាបត្រលើជំនាញ វិទ្យាសាស្រ្ដកុំព្យូទ័រ និងកំពុងបើកសាលាបង្រៀនភាសានិងកុំព្យូទ័រមួយដែលស្ថិតនៅក្នងស្រុក ត្រាំកក់ ខេត្ដតាកែវ ឈ្មោះសាលាភាសា ពន្លឺសាស្រ្ដ រូបនេះ បន្ដទៀតថា៖«ជំនាញនេះបច្ចុប្បន្នមានតម្រូវការប៉ុណ្ណឹង បើទៅថ្ងៃអនាគតហ្នឹងមានតម្រូវការកាន់តែច្រើនថែមទៀត ប៉ុន្ដែអ្នករៀនជំនាញនេះក៏ត្រូវរៀនបន្ថែមរហូតដែរ ព្រោះបច្ចេកវិទ្យាដើរទៅមុខរហូត»។
លើសពីនេះទៅទៀត យុវជន វ័យ២៧ឆ្នាំរូបនេះលើកឡើងពីបទពិសោធន៍ដែលធ្លាប់ឆ្លងកាត់កន្លងមកដែរ ថា អ្នកមានជំនាញនេះ មិនធ្វើការងារឲ្យគេក៏អាចរកប្រាក់បានដែរ គ្រាន់តែធ្វើការងារដោយខ្លួនឯងនៅលើវ៉េបសាយ និងការងារក្រៅម៉ោងខ្លះៗក៏បាន។
|
យុវតី មាស មល្លិកា និស្សិតកំពុងរៀនជំនាញព័ត៌មាននៃសាកលវិទ្យា AUPP។ រូបថត វ៉ន ដារ៉ា
យុវតី មាស មល្លិកា និស្សិតកំពុងរៀនជំនាញព័ត៌មាននៃសាកលវិទ្យា AUPP បានឲ្យដឹងដែរថា មូលហេតុដែល នាងចាប់យកជំនាញនេះ ព្រោះយល់ឃើញថា មានឱកាសច្រើនក្នុងទីផ្សារ ទំាងការងារ និងអាជីវកម្មខ្លួនឯង។
មល្លិកា លើកឡើងថា៖«ពិតប្រាកដណាស់ ថ្វីត្បិតខ្ញុំមិនទាន់បានបញ្ចប់ការសិក្សាលើជំនាញនេះ តែខ្ញុំជឿជាក់ នឹងបានជំនះសិក្សាលើជំនាញនេះ ទោះខាងឳពុកម្ដាយខ្ញុំមិនសូវជាចង់ឲ្យខ្ញុំរៀនជំនាញនេះក៏ដោយ»។
|
លោក សុខ សុភមង្គល ប្រធានក្រុមហ៊ុន Codingate។ រូបថត វ៉ន ដារ៉ា
លោក សុខ សុភមង្គល ជាយុវជនបញ្ចប់បរិញាប័ត្រលើជំនាញវិទ្យាសាស្រ្តគ្រប់គ្រងព័ត៌មានពីសាកលវិទ្យាល័យ Hradec Králové នៃសាធារណរដ្ឋឆេក បានលើកឡើងដែរថា៖«ដោយសារជំនាញព័ត៌មានវិទ្យានេះ ខ្ញុំបានផ្លាស់ប្ដូរទម្លាប់ស្វែងរកការងារធ្វើរបស់និសិ្សត ជាទូទៅនិស្សិតដែលបានបញ្ចប់ការសិក្សាលើជំនាញព័ត៌មានវិទ្យា មិនបានខ្វល់ខ្វាយពីការងារដែលពួកគេទទួលបាននោះជាការងារត្រូវជំនាញឬក៏អត់នោះទេ ឲ្យតែបានការងារធ្វើគឺសប្បាយចិត្ត។ ប៉ុន្ដែខ្ញុំបានផ្លាស់ប្ដូរឱ្យមកជាឱកាសដល់ពួកគេដោយឲ្យពួកគេបានការងារធ្វើត្រូវនឹងជំនាញដោយបានបង្កើតក្រុមហ៊ុន Codingate នេះឡើង ដែលសព្វថ្ងៃមានបុគ្គលិកសរុប ២២ នាក់»។
ជាគ្រូបង្រៀន ជាអ្នកអប់រំណែនាំ និងជាវាគ្មិនវ័យក្មេងម្នាក់ ធ្លាប់បានរៀបចំវគ្គបណ្តុះបណ្តាលខ្លីស្តីពីការគ្រប់គ្រង់ព័ត៌មាន រៀបចំរចនាគេហទំព័រ និង ការអភិវឌ្ឍដំណោះស្រាយនូវចំពោះបញ្ហានានា លោកបានចាត់ទុក មូលដ្ឋានគ្រឹះ ជាធាតុដ៏សំខាន់គឺនៅក្នុងពេលកំពុងសិក្សា។ |
| លោក ស គីណាល់ ជានាយកគ្រប់គ្រងទូទៅនៃក្រុមហ៊ុន Aplus Consulting បានលើកឡើងថា អ្នកសិក្សាព័ត៌មានវិទ្យាភាគច្រើន កំពុងប្រឈមនឹងបញ្ហាមួយ គឺកង្វះខាតជំនាញទន់។ លោក បន្ដថា៖ «អ្នកសិក្សាផ្នែកព័ត៌មានវិទ្យា មានតែជំនាញរឹង ខ្វះជំនាញទន់ ប្រៀបដូចមនុស្សយន្តអីចឹង»។ ដោយសង្កត់ធ្ងន់ទៅលើការប្រាស្រ័យទាក់ទង នាយកគ្រប់គ្រងរូបនេះ ចាត់ទុកជំនាញទន់ គឺជាកត្តាសំខាន់ដើម្បីឈានទៅភាពជោគជ័យនៅក្នុងវិជ្ជាជីវៈព័ត៌មានវិទ្យា។ |
| លោក រុន សារឹម ប្រធានផ្នែកទំនាក់ទំនង និងស្វែងរកជំនួយ នៃអង្គការ Passerelles Numerci Cambodia (PNC) បានចាត់ទុកស្វ័យសិក្សាគឺជាគន្លឹះសំខាន់សម្រាប់ទទួលបានភាគជោគជ័យទាំងការសិក្សា និងការងារ។ ដោយបានណែនាំឲ្យយុវជនកម្ពុជាចេះជ្រើសរើសបុគ្គលល្បីៗធ្វើជាគំរូ លោកបន្ថែមថា៖ «ការរៀនសូត្រដោយខ្លួនឯង អាចឲ្យយើងស្វែងយល់ពីមជ្ឈដ្ឋានជុំវិញ និងអាចទទួលបានអ្វីថ្មីៗពីអ្នកនៅជុំវិញខ្លួនទាំងនៅសាលារៀន និងការងារ»។ |
| លោក ស្រេង ចំរើន ធានផ្នែកធនធានមនុស្សនៃក្រុមហ៊ុនផ្គត់ផ្គង់សេវាអ៊ិនធឺណិត EZECOM បានប្រាប់ឲ្យយុវជនដែលរៀនជំនាញ IT កម្ពុជា ឲ្យស្វែងយល់ពីដំណើរវិវត្តន៍ទាំងនៅលើពិភពលោក និងនៅក្នុងប្រទេសកម្ពុជា។ លោកនិយាយថា៖ «ដើម្បីទទួលបានភាពជោគជ័យក្នុងអាជីពព័ត៌មានវិទ្យា និស្សិតគួរសិក្សាបន្ថែមទៅលើតម្រូវការជាក់ស្ដែងរបស់ពិភពលោក និងតម្រូវការក្នុងស្រុក»៕ ដកស្រង់អត្ថបទពីភ្នំពេញប៉ុស្ដិ៍ ដោយ មី ឡងឌី សូមចុចfollowដើម្បីបានអត្ថបទថ្មីៗបន្តទៀតយ៉ាងរហ័សពី Langdytech |
No comments:
Post a Comment