ហ្វ៊ូណន ភាពយន្ដតុក្កតាពីរបបខ្មែរក្រហម បន្តឈ្នះពាននៅអាមេរិក
ផលិតករភាពយន្តគំនូរជីវចលហ្វ៊ូណន ក្នុងមហោស្រពភាពយន្តគំនូរជីវចលនៅប្រទេសបារាំង។ AFP
ក្រុងឡូសអេនជឺលេស: «ហ្វ៊ូណន» ដំណើររឿងអ្នកម្ដាយក្មេងម្នាក់ព្យាយាមជួបជុំក្រុមគ្រួសារ អំឡុងរបបខ្មែរក្រហម ទសវត្សរ៍ឆ្នាំ ១៩៧០ បានឈ្នះពាន Grand Prize និង Audience Award នៅមហោស្រពភាពយន្ដគំនូរជីវចល (Animation Is Film Festival) ដែលរៀបចំឡើងនៅថ្ងៃទី ១៩ ដល់ ២១ ខែតុលា នៅទីក្រុងឡូសអេនជឺលេស សហរដ្ឋអាមេរិក។
ភាពយន្ដ ១ ម៉ោង ២៦ នាទី ដឹកនាំដោយលោក ដេនីស ដូ បានដាក់បញ្ចាំងនៅអាមេរិកខាងជើង ក្នុងព្រឹត្ដិការណ៍មហោស្រព ក្រោយពីទទួលបានកិត្ដិយសយ៉ាងធំធេងនៅមហោស្រពភាពយន្ដគំនូរជីវចល Annecy Intl. Animation Film Festival នៅបារាំង កាលពីខែមិថុនា។
កើតនៅទីក្រុងប៉ារីស ឆ្នាំ ១៩៨៥ លោក ដេនីស បានលូតលាស់ជាមួយវប្បធម៌ ៣ ដែលសុទ្ធតែឆ្លុះបញ្ចាំងពីគំនិត និងស្នាដៃរបស់លោកចាប់ពីបារាំង ចិន និងកម្ពុជា។
ផលិតករអាយុ ៣៣ ឆ្នាំ តែងតែចូលចិត្ដរូបភាព និងគំនូរ រហូតក្នុងឆ្នាំ ២០០៩ លោកបានបញ្ចប់ការសិក្សាពី Les Gobelins «L'ecole de l'image» ក្នុងផ្នែកគំនូរជីវចល និងផលិតភាពយន្ដ ជាទុនក្នុងអាជីពមួយនេះ។
ប្រធានគណៈកម្មការមហោស្រពគំនូរជីវចល Animation Is Film Festival លោក ភេតធ័រ ដេប្រ៊ូក បានថ្លែងប្រាប់ Variety ថា៖ «ហ្វ៊ូណន បានរំឭកយើងថា គំនូរជីវចលអាចរៀបរាប់អំពីដំណើររឿងគ្រប់យ៉ាង។ ការផ្សព្វផ្សាយតាមរយៈបច្ចេកវិទ្យាកុំព្យូទ័រហាក់គ្មានដែនកំណត់នោះឡើយ»។
លោក ដេនីស បានស្វែងយល់ពីអ្វី ដែលអ្នកម្ដាយរបស់លោកបានជួបបទពិសោធក្នុងរបបខ្មែរក្រហម បានបន្ដថា៖ «ក្នុងរឿងហ្វ៊ូណន លទ្ធផលបានបង្ហាញរឿងល្អដែលមិននឹកស្មានដល់ ក្នុងស្ថានភាពដូចនរក។
គណៈកម្មការបានឯកភាពថា សមិទ្ធផលនេះ កាន់តែមានថាមពលពេលត្រូវបានផលិតជារឿងគំនូរជីវចល»។
រូបភាពដកស្រង់ពីភាពយន្តគំនូរជីវចលរឿង Funan។ ហ្វេសប៊ុក
ភាពយន្តជីវចលផ្ដើមចេញពីគំនូរដោយដៃយ៉ាងផ្ចិតផ្ចង់ បានរំលេចរូបភាពតួអង្គមុខមាត់រូបរាងជាខ្មែរ ទាំងទម្រង់ភ្នែក និងច្រមុះ។ សូម្បីតែទឹកមុខក៏ស្ដែងនូវអារម្មណ៍ដ៏ជ្រាលជ្រៅពីតួអង្គផងដែរ។ ផលិតករ មានបំណងបង្ហាញព្រឹត្ដិការណ៍ដ៏តក់ស្លុតក្នុងរបបខ្មែរក្រហម តែមិនរំលេចសកម្មភាពហិង្សាលើផ្ទាំងសំពត់សនោះឡើយ។
ការមិនបង្ហាញរូបភាពវាយតប់ រំលោភ និងអត្តឃាតគឺជាជម្រើសរបស់លោក ដើម្បីរក្សាឈ្មោះប្រភេទជាភាពយន្តតម្រូវទស្សនិកជនគ្រួសារ៕HR
គំនូរជីវចលនិយាយពីអ្នកម្ដាយក្នុងរបបខ្មែរក្រហម។ Youtube
សូមចុចfollowដើម្បីបានអត្ថបទថ្មីៗបន្តទៀតយ៉ាងរហ័សពី Langdytech
សូមចុចfollowដើម្បីបានអត្ថបទថ្មីៗបន្តទៀតយ៉ាងរហ័សពី Langdytech
No comments:
Post a Comment